നീറ്റ് അഡ്മിറ്റ് കാര്‍ഡ് സെപ്റ്റംബര്‍ രണ്ടാം വാരം മുതല്‍; സൈറ്റില്‍ നിന്ന് ഡൗണ്‍ലോഡ് ചെയ്യാം

ന്യൂഡല്‍ഹി: മെഡിക്കല്‍ പ്രവേശന പരീക്ഷയായ നീറ്റിന്റെ അഡ്മിറ്റ് കാര്‍ഡ് സെപ്റ്റംബര്‍ രണ്ടാം വാരം മുതല്‍ വിദ്യാര്‍ഥികള്‍ക്ക് ഡൗണ്‍ലോഡ് ചെയ്‌തെടുക്കാമെന്ന് അധികൃതര്‍. സെപ്റ്റംബര്‍ ഒന്‍പത് മുതല്‍ അഡ്മിറ്റ് കാര്‍ഡ് വെബ്‌സൈറ്റില്‍ ലഭ്യമാക്കാനാണ് തീരുമാനം. സെപ്റ്റംബര്‍ 12നാണ് നീറ്റ് പരീക്ഷ. പരീക്ഷ നടക്കുന്നതിന്റെ മൂന്നു ദിവസം മുമ്ബ് അഡ്മിറ്റ് കാര്‍ഡ് വെബ്‌സൈറ്റില്‍ വരുമെന്ന് നാഷണല്‍ ടെസ്റ്റിംഗ് ഏജന്‍സി അറിയിച്ചു.ഔദ്യോഗിക വെബ്‌സൈറ്റായ ntaneet.nic.in സന്ദര്‍ശിച്ച്‌ അഡ്മിറ്റ് കാര്‍ഡ് ഡൗണ്‍ലോഡ് ചെയ്യാം. അഡ്മിറ്റ് കാര്‍ഡ് കൈവശമില്ലാത്തവരെ പരീക്ഷാ ഹാളില്‍ പ്രവേശിപ്പിക്കില്ല. എംബിബിഎസ്, ബിഡിഎസ്, ബിഎഎംഎസ്, ബിഎസ്‌എംഎസ്, ബിയുഎംഎസ്, ബിഎച്ച്‌എംഎസ് തുടങ്ങിയ കോഴ്‌സുകളിലേക്കുള്ള പ്രവേശന പരീക്ഷയാണ് നീറ്റ്. അഡ്മിറ്റ് കാര്‍ഡില്‍ പരീക്ഷാതീയതിയും പരീക്ഷാഹാളും സംബന്ധിച്ച വിവരങ്ങള്‍ രേഖപ്പെടുത്തുമെന്നും നാഷണല്‍ ടെസ്റ്റിംഗ് ഏജന്‍സി അറിയിച്ചു.