'സല്ലാപം' മുതല്‍ 'ലൂസിഫര്‍' വരെ: മഞ്ജു വാര്യര്‍ മലയാള സിനിമ കീഴടക്കിയ കഥ

ആണ്‍വേഷങ്ങള്‍ക്ക് പ്രാധാന്യം കൂടുതല്‍ നല്‍കി മെനഞ്ഞെടുത്ത തിരക്കഥകളായിരുന്നു അന്ന് കൂടുതലും. സ്ത്രീ കഥാപാത്രങ്ങള്‍ ശിഥിലവും ആര്‍ക്കു വേണമെങ്കിലും ചെയ്യാന്‍ പറ്റാവുന്ന രീതിയില്‍ അഭിനയ പ്രാധാന്യം ഏറെ കുറഞ്ഞ രീതിയിലുള്ളതാവുകയും ചെയ്തു.

തൊണ്ണൂറുകളുടെ പകുതിയില്‍ മലയാള സിനിമയില്‍ നിറഞ്ഞു നിന്ന ഉര്‍വശി, ശോഭന എന്നിവര്‍ മെല്ലെ മെല്ലെ പിന്‍വാങ്ങുന്ന കാഴ്ചയാണ് നമ്മള്‍ കണ്ടത്. ആണ്‍വേഷങ്ങള്‍ക്ക് പ്രാധാന്യം കൂടുതല്‍ നല്‍കി മെനഞ്ഞെടുത്ത തിരക്കഥകളായിരുന്നു അന്ന് കൂടുതലും. സ്ത്രീ കഥാപാത്രങ്ങള്‍ ശിഥിലവും ആര്‍ക്കു വേണമെങ്കിലും ചെയ്യാന്‍ പറ്റാവുന്ന രീതിയില്‍ അഭിനയ പ്രാധാന്യം ഏറെ കുറഞ്ഞ രീതിയിലുള്ളതാവുകയും ചെയ്തു. മലയാള സിനിമയുടെ മൂല്യം കുറഞ്ഞു കുറഞ്ഞു വരുന്ന ഒരു കാലഘട്ടമായിരുന്നു അത്.

ലോഹിതദാസ് തിരക്കഥയെഴുതി സുന്ദര്‍ദാസ് സംവിധാനം ചെയ്ത ' സല്ലാപം' എന്ന സിനിമയില്‍ നായികാ പദവിയില്‍ ആ പതിനെട്ടുകാരി എത്തിയത് ഈ കാലഘട്ടത്തിലാണ്. ഒരു പാട്ടുകാരനുമായി പ്രണയത്തിലാകുന്ന വീട്ടുവേലക്കാരിയായ രാധ എന്ന കഥാപാത്രം ഏറെ കയ്യടക്കത്തോടെ അവതരിപ്പിച്ച മഞ്ജു വാര്യര്‍ എന്ന ആ പെണ്‍കുട്ടി അങ്ങനെയാണ് മലയാള സിനിമാ പ്രേക്ഷകരുടെ ഹൃദയത്തിലേയ്ക്ക് ആദ്യമായി ചെന്നു കയറുന്നത്. പാവാടയും ബ്ലൌസുമിട്ട്‌ സ്ക്രീനില്‍ നിറഞ്ഞു നിന്ന ആ പെണ്‍കുട്ടി അടുത്ത ഒരു ദശാബ്ദത്തോളം മലയാള സിനിമ അടക്കി വാഴുമെന്ന് അന്നാരും കരുതിയിരുന്നില്ല എന്നതാണ് സത്യം.

മലയാള സിനിമയില്‍ മുന്‍പൊരിക്കലും സംഭവിച്ചിട്ടില്ലാത്ത ഒരു പ്രതിഭാസത്തിന് സാക്ഷ്യം വഹിക്കാന്‍ തുടങ്ങുകയായിരുന്നു അന്ന് കേരളം. മഞ്ജു വാര്യര്‍ എന്ന നടി സിനിമാ പ്രേക്ഷകര്‍ക്ക്
'അയല്‍പക്കത്തെ പെണ്‍കുട്ടി'യായി. പ്രായമേറിത്തുടങ്ങിയ സൂപ്പര്‍സ്റ്റാറുകള്‍ക്കിടയില്‍ ശക്തമായ കഥാപാത്രങ്ങളുമായി എത്തിയ ആ മുഖത്തിന് മുന്‍പൊരിക്കലും ആര്‍ക്കും അവകാശപ്പെടാനില്ലാത്ത ഒരു പുതുമയുണ്ടായിരുന്നു. അതുകൊണ്ടുതന്നെ പിന്നീട് ദിലീപുമായുള്ള വിവാഹശേഷം സിനിമാഭിനയത്തില്‍ നിന്നും പിന്‍വാങ്ങിയിട്ടും മലയാളികള്‍ മഞ്ജുവിനെ ഓര്‍ക്കാതിരുന്നില്ല. ഓരോ പുതിയ നടിമാര്‍ കഴിവ് തെളിയിക്കുമ്പോഴും 'മഞ്ജുവിനെപ്പോലെ' അല്ലെങ്കില്‍ 'മഞ്ജുവിന് പകരം' എന്നിങ്ങനെയായിരുന്നു പ്രേക്ഷകര്‍ കണ്ടത്. മഞ്ജു എന്നത് അഭിനയത്തിന്‍റെ അളവുകോലായി എപ്പോഴോ മാറിക്കഴിഞ്ഞിരുന്നു. വര്‍ഷങ്ങള്‍ കഴിഞ്ഞ് സിനിമയിലേയ്ക്ക് തിരിച്ചു വന്നപ്പോഴും ആഹ്ളാദാരവങ്ങളോടെ സിനിമാലോകം അവരെ ഇരുകയ്യും നീട്ടി സ്വീകരിച്ചതും മഞ്ജു എന്ന അപാര അഭിനയ പ്രതിഭയോടുള്ള ആദരവും സ്നേഹവുമാണ്.