വാഷിങ്​ടണ്‍: ഗ്രീന്‍ കാര്‍ഡ്​ അപേക്ഷകര്‍ക്ക്​ പ്രവേശനം വിലക്കിയ മുന്‍ പ്രസിഡന്‍റ്​ ഡോണള്‍ഡ്​ ട്രംപിന്‍റെ ഉത്തരവ്​ പിന്‍വലിച്ച്‌​ ജോ ബൈഡന്‍. അധികാരമേറ്റ ശേഷം നിരവധി തീരുമാനങ്ങളില്‍ ട്രംപിനെ തിരുത്തിയ പുതിയ പ്രസിഡന്‍റിന്‍റെ ഏറ്റവും പുതിയ നയം ഇന്ത്യക്കാരുള്‍പെടെ നിരവധി ​പേര്‍ക്ക്​ തുണയാകും. കൊറോണയില്‍ വലഞ്ഞ്​ വ്യാപക തൊഴില്‍ നഷ്​ടം അലട്ടുന്ന രാജ്യത്ത്​ യു.എസ്​ പൗരന്മാരെ ബാധിക്കുന്നുവെന്ന്​ കാണിച്ചായിരുന്നു ​ഗ്രീന്‍കാര്‍ഡുകാര്‍ക്ക്​ ട്രംപ്​ പ്രവേശനം വിലക്കിയത്​. എന്നാല്‍, കുടുംബത്തിനൊപ്പം ചേരാന്‍ പലര്‍ക്കും ഇത്​ തടസ്സമാകുകയാണെന്നും യു.എസ്​ വ്യവസായങ്ങളെ പ്രതികൂലമായി ബാധിക്കുകയാണെന്നും ബൈഡന്‍ പറഞ്ഞു.

കുടിയേറ്റ നയങ്ങളില്‍ ട്രംപിന്‍റെ നയങ്ങള്‍ തിരുത്തുമെന്ന്​ തെരഞ്ഞെടുപ്പ്​ പ്രചാരണത്തിനിടെ ബൈഡന്‍ ​പ്രഖ്യാപനം നടത്തിയിരുന്നു. മുസ്​ലിം രാജ്യങ്ങള്‍ക്ക്​ ഏര്‍പെടുത്തിയ യു.എസ്​ യാത്രാ വിലക്ക്​ ഇതിന്‍റെ ഭാഗമായി നേരത്തെ ബൈഡന്‍ പിന്‍വലിച്ചിട്ടുണ്ട്​. വിദേശ അതി​ഥി തൊഴിലാളികള്‍ക്ക്​ വിലക്കേര്‍പെടുത്തിയ നടപടി കാലി​േഫാര്‍ണിയ ഫെഡറല്‍ ജഡ്​ജിയും റദ്ദാക്കി.

2020 അവസാനം വരെ ഗ്രീന്‍ കാര്‍ഡ്​ വിതരണം നിര്‍ത്തി ആദ്യം പുറപ്പെടുവിച്ച ഉത്തരവ്​ അടുത്തിടെ മാര്‍ച്ച്‌​ അവസാനം വരെയാക്കി ട്രംപ്​ ദീര്‍ഘിപ്പിച്ചിരുന്നു. കഴിഞ്ഞ വര്‍ഷം മാത്രം 1,20,000 വിസകള്‍ ഈ ഉത്തരവു പ്രകാരം നഷ്​ടപ്പെട്ടതായാണ്​ കണക്ക്​. യു.എസില്‍ തൊഴിലെടുക്കുന്നവര്‍ക്ക്​ കുടുംബങ്ങളെ കൊണ്ടുവരലും ഇതോടെ കുരുക്കായി. തൊഴില്‍ വിസയുള്ളവര്‍ക്കും വിലക്കുവീണു. 1.4 കോടി പേരാണ്​ ഇതുവരെ ഗ്രീന്‍കാര്‍ഡിന്​ അപേക്ഷ നല്‍കി കാത്തിരിക്കുന്നത്​. ഇതിനു പുറമെ നാലര ലക്ഷത്തോളം കുടുംബ വിസക്കാരും കാത്തിരിക്കുന്നുണ്ട്​. ഇത്രയും കൂടുതല്‍ പേര്‍ക്ക്​ ഒന്നിച്ച്‌​ വിസ അനുവദിക്കാനാവില്ലെന്നതിനാല്‍ പലരുടെയും കാത്തിരിപ്പ്​ തുടരാനാണ്​ സാധ്യത.