കോവിഡ് വാക്‌സിന്‍; ബൂസ്റ്റര്‍ ഷോട്ട് സ്വീകരിച്ച്‌ അമേരിക്കന്‍ പ്രസിഡന്റ് ജോ ബൈഡന്‍

വാഷിങ്ടണ്‍: കോവിഡ് വാക്‌സിന്റെ ബൂസ്റ്റര്‍ ഷോട്ട് സ്വീകരിച്ച്‌ അമേരിക്കന്‍ പ്രസിഡന്റ് ജോ ബൈഡന്‍. പുതുക്കിയ കോവിഡ് മാര്‍ഗനിര്‍ദേശങ്ങള്‍ പ്രകാരം 65 വയസ്സ് പിന്നിട്ടവര്‍ക്ക് കോവിഡ് വാക്‌സിന്റെ മൂന്നാമത്തെ കുത്തിവെപ്പായ ബൂസ്റ്റര്‍ ഷോട്ട് നല്‍കാന്‍ തീരുമാനിച്ചിരുന്നു.

ആരോഗ്യ പ്രവര്‍ത്തകര്‍ വൈറ്റ് ഹൗസില്‍ എത്തിയ ശേഷമാണ് ഫൈസര്‍ വാക്‌സിന്റെ ബൂസ്റ്റര്‍ ഷോട്ട് ബൈഡന് നല്‍കിയത്. അമേരിക്കയുടെ ഏറ്റവും പ്രായം കൂടിയ പ്രസിഡന്റുമാരില്‍ ഒരാളായ ബൈഡന് ഇപ്പോള്‍ 78 വയസ്സാണ് പ്രായം.

ആരോഗ്യപ്രശ്‌നങ്ങള്‍ ഉള്ളവര്‍ക്കും വൈറസ് വ്യാപനം കൂടുതലുള്ള പ്രദേശങ്ങളില്‍ ജോലി ചെയ്യുന്നവര്‍ക്കും ബൂസ്റ്റര്‍ ഡോസ് നല്‍കാന്‍ തീരുമാനമായി. എന്നാല്‍ വലിയൊരു വിഭാഗം അമേരിക്കക്കാര്‍ വാക്‌സിന്‍ സ്വീകരിക്കാന്‍ വിമുഖത കാണിക്കുകയാണെന്ന് ബൈഡന്‍ പറഞ്ഞു.