കണ്ണുനീർ പെണ്ണുങ്ങൾക്കുമാത്രം കൈമുതലാണ് എന്നാണ് പൊതുവെ ഉള്ള സംസാര വിഷയം. സന്തോഷം വന്നാലും സങ്കടം വന്നാലും പെണ്ണുങ്ങൾക്ക് കരച്ചിൽ വരും. അതെ സമയം ആണുങ്ങൾക്ക് എന്ത് പ്രശ്നം വന്നാലും തളരാതെ നിക്കുവാനും, കരയാതിരിക്കാനുമുള്ള സഹനശക്തി  ഉണ്ട് എന്നാണ് പൊതുവെയുള്ള ധാരണ. എന്നാൽ കണ്ണൂർ ജില്ലയിലെ പെരിങ്ങോം താലൂക്ക് ആശുപത്രിയിലെ അസി.സർജന്റെ കുറിപ്പാണു ഇപ്പോൾ സോഷ്യൽ മീഡിയയിൽ വൈറൽ.

ആണുങ്ങളെ അധികം കരഞ്ഞു കാണാറില്ല അല്ലെ? പക്ഷെ അവർ കരയുമ്പോൾ അവരുടെ നെഞ്ചിൽ എത്ര മാത്രം തീ പുകയുന്നുണ്ടാകും എന്നാണ് ഷിനു ഫേസ് ബുക്ക് കുറിപ്പിലൂടെ വ്യക്തമാക്കുന്നത്. തന്‍റെ മുന്നില്‍ എത്തിയ ദമ്ബതികളില്‍ നിന്നുണ്ടായ ജീവിതാനുഭവങ്ങളെ പറ്റിയാണ് ഷിനു ഇത് കുറിച്ചിരിക്കുന്നത്.

പോസ്റ്റിന്റെ പൂർണ്ണ രൂപം

ആണുങ്ങളെ അധികം കരഞ്ഞു കാണാറില്ല അല്ലെ? പക്ഷെ അവർ കരയുമ്പോൾ അവരുടെ നെഞ്ചിൽ എത്ര മാത്രം തീ പുകയുന്നുണ്ടാകും?

ഒ.പി യിൽ അയാളുടെ കണ്ണുകൾ നിറഞ്ഞൊഴുകുന്നുണ്ട്. തോളിലെ തോർത്തിൽ കണ്ണുകൾ ഇടയ്ക്കിടയ്ക്ക് ഒപ്പുന്നുണ്ട്. ഭാര്യയുടെ കൈയ്യിലുള്ള വെളുത്ത തോർത്തു കൊണ്ട് അവർ മുഖം മൂടിയിട്ടുണ്ട്.

തൃശൂർ മെഡിക്കൽ കോളേജിലെ പേപ്പറുകളാണ് കൈയ്യിൽ. അവ എനിക്ക് നേരെ നീട്ടി. ഈ. എസ്.ഐ ആശുപത്രിയിൽ മെഡിക്കൽ ലീവ് എടുക്കാൻ വന്നതാണവർ. മെഡിക്കൽ റിപ്പോർട്ടിൽ “adenocarcinoma colon” എന്ന് എഴുതിയിട്ടുണ്ട്. ഭാര്യയുടെ വൻകുടലിൽ ക്യാന്സറാണ്.

“വീട്ടിൽ ആരൊക്കെ ഉണ്ട്” ഞാൻ ചോദിച്ചു

“ഞാനും ഭാര്യയും മാഡം”

“മക്കൾ എന്ത് ചെയ്യുന്നു?”

“മക്കളില്ല “..

വീണ്ടും വിധിയുടെ ക്രൂരത. വാർധക്യത്തിലും.. ഏകാന്തതയുടെ തീച്ചൂളയിൽ എരിയുന്ന തീയിലേയ്ക്ക് വീണ്ടും തീനാളം പതിച്ചു കൊണ്ടേയിരുന്നു.

ഭാര്യ കരയുന്നേയില്ല. മരവിച്ച മനസ്സുമായി അവർ എന്റെ അടുത്തു ഇരിപ്പുണ്ട്. പക്ഷെ ഭർത്താവിന്റെ കണ്ണുകളിൽ നിന്ന് നിറഞ്ഞു ഒഴുകുന്ന ചാലിനെ എനിക്ക് അടയ്ക്കുവാൻ സാധിച്ചില്ല.

“കരയേണ്ട, അസുഖം ഒക്കെ മാറില്ലേ? എല്ലാം ശെരിയാകും”

എന്നു പറഞ്ഞു ലീവ് എഴുതി കൊടുത്തപ്പോൾ ഭാര്യ ഡോർ തുറന്ന് പുറത്തേയ്ക്ക് പോയി. അദ്ദേഹം ആരും കാണാതെയിരിക്കുവാൻ എന്റെ മുന്നിൽ ആ കണ്ണുകൾ തുടച്ചതിന് ശേഷം ചിരിച്ചു കൊണ്ട് പുറത്തേയ്ക്ക് ഇറങ്ങി. മറ്റുള്ളവരുടെ മുൻപിൽ ആണുങ്ങൾ ചിരിക്കും. ഉള്ളിൽ കരഞ്ഞുകൊണ്ട് അവർ ചിരിക്കും.😔

ഇത്രയും ഭാര്യയെ സ്നേഹമുള്ള ഭർത്താവിനെ അവർക്ക് ലഭിച്ചില്ലേ. കരയാത്ത പുരുഷന്മാർ കരയുമ്പോൾ ഒരു കടൽ തന്നെ അവിടെ ഒഴുകും. ആ കടലിനെ തടുക്കുവാൻ ആർക്കും സാധിക്കില്ല😔.

അവർ വേഗം സുഖം പ്രാപിക്കട്ടെ..

ഡോ. ഷിനു ശ്യാമളൻ