എയര്‍ക്രാഫ്റ്റ്, ഡ്രോണ്‍, ക്രൂയിസ് മിസൈല്‍, ബാലിസ്റ്റിക് മിസൈല്‍ ആക്രമണങ്ങള്‍ പ്രതിരോധിക്കുന്നതിനുള്ള സംവിധാനമാണ് പാട്രിയട്ട് മിസൈല്‍ സിസ്റ്റം. ബഹ്‌റൈന്‍, ജോര്‍ദാന്‍, കുവൈത്ത്, ഖത്വര്‍, യു എ ഇ എന്നിവിടങ്ങളിലാണ് നിലവില്‍ പാട്രിയട്ട് മിസൈല്‍ സിസ്റ്റം വിന്യസിച്ചിട്ടുള്ളത്. എബ്രഹാം ലിങ്കണ്‍ വിമാനവാഹിനി കപ്പലിന്റെ ഭാഗമാകാന്‍ യു എസ് പ്രതിരോധ മന്ത്രാലയം ആക്ടിംഗ് സെക്രട്ടറിയാണ് അനുമതി നല്‍കിയത്. ബി- 52 ബോംബര്‍ വിമാനങ്ങള്‍ ഉള്‍പ്പെടുന്ന യു എസ് ബോംബര്‍ ടാസ്‌ക് ഫോഴ്‌സ് നേരത്തേ തന്നെ ഖത്വറിലെ അല്‍ ഉദൈദ് വിമാനത്താവളത്തിലെത്തിയതായി യു എസ് സെന്‍ട്രല്‍ കമാന്‍ഡ് സ്ഥിരീകരിച്ചിട്ടുണ്ട്. ഇറാന്റെ നീക്കങ്ങള്‍ നിരീക്ഷിച്ചുവരികയാണെന്നും ഓപറേഷന്‍ സുരക്ഷ പരിഗണിച്ച്‌ സൈനിക നീക്കമുള്‍പ്പെടെയുള്ള വിശദാംശങ്ങള്‍ പുറത്തുവിടാനാകില്ലെന്നും യു എസ് വാര്‍ത്താക്കുറിപ്പില്‍ അറിയിച്ചു. ഇറാനുമായി സംഘര്‍ഷമുണ്ടാക്കാന്‍ ആഗ്രഹിക്കുന്നില്ലെന്നും ആക്രമണത്തെ പ്രതിരോധിക്കാന്‍ തയ്യാറാണെന്നും യു എസ് അറിയിച്ചു. ആക്രമണത്തിന് സജ്ജമായി ഇറാന്‍ ബോട്ടുകളില്‍ മിസൈല്‍ വിന്യസിച്ചിട്ടുണ്ടെന്ന് പേരുവെളിപ്പെടുത്താത്ത യു എസ് ഉദ്യോഗസ്ഥന്‍ വാര്‍ത്താ ഏജന്‍സിയോട് പറഞ്ഞു. യു എസിന്റെ നൂറ് കോടി വില വരുന്ന കപ്പല്‍പ്പടയെ ഒരു മിസൈല്‍ കൊണ്ട് തകര്‍ക്കാന്‍ സാധിക്കുമെന്ന് ഇറാന്‍ നേതൃത്വത്തെ ഉദ്ധരിച്ച്‌ ഇറാനിലെ ഔദ്യോഗിക വാര്‍ത്താ ഏജന്‍സിയായ ഐ എസ് എന്‍ എ റിപ്പോര്‍ട്ട് ചെയ്തു.