ഗാര്‍ഹിക പീഡനങ്ങള്‍ക്ക് അടക്കം ഈ നിയമം കാരണം കുറവുണ്ടാകുമെന്ന പ്രതീക്ഷയിലാണ് സൗദി. ഭാര്യയെയോ സഹോദരിയെയോ കുടുംബത്തിലെ മറ്റേതെങ്കിലും സ്ത്രീകള്‍ക്കെതിരെയുള്ള അതിക്രമങ്ങള്‍ നടത്തും മുമ്പ് ഏത് പുരുഷനെയും രണ്ടാമതൊന്ന് ചിന്തിക്കാന്‍ ഈ നിയമം മൂലം സാധിക്കും. അടുത്തിടെയായി സ്ത്രീകള്‍ക്കായി ഒരുപാട് നിയമങ്ങള്‍ സൗദി കൊണ്ടുവരുന്നുണ്ട്. സ്ത്രീ സുരക്ഷ വര്‍ധിപ്പിക്കുക എന്നത് മുഹമ്മദ് ബിന്‍ സല്‍മാന്റെ പാശ്ചാത്യ ലോക സങ്കല്‍പ്പത്തിന്റെ ഭാഗമാണ്. സ്ത്രീകള്‍ക്ക് കൂടുതല്‍ സ്വാതന്ത്ര്യവും സുരക്ഷയും ഒപ്പം അവരുടെ അവകാശങ്ങളും ഉറപ്പാക്കാനാണ് സൗദിയുടെ ശ്രമം. നേരത്തെ ഫുട്‌ബോള്‍ ടീം അടക്കമുള്ളവയും, ഒപ്പം വനിതാ ഫുട്‌ബോള്‍ ലീഗും സൗദി ആരംഭിച്ചിരുന്നു. മുഹമ്മദ് ബില്‍ സല്‍മാന്‍ 2017ല്‍ ഭരണകേന്ദ്രത്തില്‍ എത്തിയ ശേഷം ഒരുപാട് അവകാശങ്ങള്‍ സ്ത്രീകള്‍ക്കായി കൊണ്ടുവരുന്നുണ്ട്. സൗദിയുടെ വിഷന്‍ 2030 ലക്ഷ്യമിടുന്നതും സ്ത്രീകളുടെ ഉന്നമനമാണ്. തൊഴില്‍ ചെയ്യാനും ഡ്രൈവ് ചെയ്യാനും യാത്രകള്‍ ചെയ്യാനും അനുമതി നല്‍കിയിരുന്നു. ഇതിനായി പുരുഷന്‍മാരുടെ അനുമതി വേണ്ടെന്നും നിയമം കൊണ്ടുവന്നിരുന്നു. അതേസമയം കൂടുതല്‍ നടപടികള്‍ വേണമെന്നാണ് സൗദി മനുഷ്യാവകാശ കമ്മീഷന്‍ പറയുന്നത്. എല്ലാ മനുഷ്യാവകാശ സംഘടനകളുമായും സഹകരണം സൗദിക്കുണ്ടാവണം. സ്ത്രീകള്‍ക്കെതിരെയുള്ള എല്ലാ അതിക്രമങ്ങളെയും തുടച്ച് നീക്കാനാണ് നടപടികള്‍ വേണ്ടതെന്നും സൗദി മനുഷ്യാവകാശ കമ്മീഷന്‍ പ്രസിഡന്റ് അവദ് അല്‍ അവദ് പറഞ്ഞു. ജനങ്ങള്‍ക്കിടയില്‍ സ്ത്രീകളുടെ അവകാശങ്ങളെ കുറിച്ചുള്ള അവബോധം കൊണ്ടുവരണമെന്നും അദ്ദേഹം ആവശ്യപ്പെട്ടു.