കീടനാശിനിയും ബാക്​ടീരിയയും; ലബനാന്‍ പച്ചക്കറികള്‍ക്ക്​ നിരോധനവുമായി ഖത്തര്‍

ദോഹ: കൂടിയ അളവില്‍ രാസവസ്​തുക്കളും ഇ കോളി ബാക്​ടീരിയകളുടെ അംശവും കണ്ടെത്തിയതിനെ തുടര്‍ന്ന്​ ലബനാനില്‍നിന്നുള്ള പച്ചക്കറി ഇറക്കുമതിക്ക്​ നിരോധനം ഏര്‍പ്പെടുത്തി ഖത്തര്‍. മല്ലിയില, പുതിന, പാഴ്സലി, മൊലോകിയ, സ്​കാര്‍സ്ലി, തൈം തുടങ്ങി ആറു വിഭാഗം ഇലകള്‍ക്കാണ് നിരോധനമേര്‍പ്പെടുത്തുന്നത്.
സാംപിളുകളിലെ പരിശോധനയില്‍ രാസവസ്തുക്കളുടെ സാന്നിധ്യവും ഇ കോളി ബാക്​ടീരിയകളും കണ്ടെത്തിയതിനെ തുടര്‍ന്നാണ് നടപടി. നവംബര്‍ ഏഴു​ മുതല്‍ ലബനാനില്‍നിന്ന്​ നിരോധിക്കപ്പെട്ട പച്ചക്കറികള്‍ ഇറക്കുമതി ചെയ്യരുതെന്നാണ് ഉത്തരവ്. ഖത്തറില്‍ സ്വദേശികളും വിദേശികളും ഭക്ഷണത്തിനൊപ്പം വേവിക്കാതെതന്നെ കഴിക്കുന്ന ഇലകളാണിവ. ഈ സാഹചര്യത്തില്‍കൂടിയാണ് ഇത്തരം പച്ചക്കറികളുടെ പരിശോധനകള്‍ കര്‍ശനമാക്കിയത്. ഖത്തര്‍ ആരോഗ്യ മന്ത്രാലയത്തിനു കീഴിലെ പോര്‍ട്​സ്​ ഹെല്‍ത്ത്​ ആന്‍ഡ്​ ഫുഡ്​ കണ്‍ട്രോള്‍ വിഭാഗമാണ്​ നിരോധനം സംബന്ധിച്ച അറിയിപ്പ്​ പുറത്തുവിട്ടത്​. ക​ഴിഞ്ഞ ഏതാനും മാസങ്ങളിലെ സാംപിളുകളില്‍ ആവര്‍ത്തിച്ച്‌​ നടത്തിയ പരിശോധനയുടെ അടിസ്​ഥാനത്തിലാണ്​ നിരോധനമെന്ന്​ അറിയിപ്പില്‍ വ്യക്​തമാക്കി. ഭക്ഷ്യസുരക്ഷക്ക്​ ഏറ്റവും കൂടുതല്‍ പ്രാധാന്യം നല്‍കുന്ന രാജ്യങ്ങളിലൊന്നായ ഖത്തര്‍ ഇറക്കുമതി ചെയ്യുന്ന വസ്തുക്കളുടെ ഗുണനിലവാര പരിശോധനക്കായി ഏറ്റവും നൂതനവും കുറ്റമറ്റതുമായ സംവിധാനങ്ങളാണ് നടപ്പാക്കിക്കൊണ്ടിരിക്കുന്നത്. അതേസമയം, വിഷയം ശ്രദ്ധയില്‍പെട്ടിട്ടുണ്ടെന്നും, കയറ്റുമതിക്കാര്‍ക്കെതിരെ നിയമ നടപടിയും വിലക്കും ഏര്‍പ്പെടുത്തുമെന്നും ലബനാന്‍ കൃഷി മന്ത്രി അബ്ബാസ്​ ഹജ്ജ്​ ഹസനെ ഉദ്ധരിച്ച്‌​ മാധ്യമങ്ങള്‍ റിപ്പോര്‍ട്ട്​ ചെയ്​തു.