ദോഹ: നാറ്റോ ഇതര സഖ്യരാജ്യം എന്ന പദവിയിലേക്ക്​ ഖത്തറിനെ നിര്‍ദേശിച്ച്‌​ അമേരിക്കന്‍ പ്രസിഡന്‍റ് ജോ ബൈഡന്‍.

അമീര്‍ ശൈഖ്​ തമീം ബിന്‍ ഹമദ്​ ആല്‍ഥാനിയുടെ മൂന്നു ദിവസത്തെ പര്യടനത്തിനിടയില്‍ നടന്ന കൂടിക്കാഴ്ചയിലാണ്​ അമേരിക്കന്‍ പ്രസിഡന്‍റ്​​ ഖത്തറിനെ പ്രധാന സൗഹൃദ രാഷ്ട്രമെന്ന നിലയില്‍ നാറ്റോ ഇതര സഖ്യരാജ്യ പദവിയിലേക്ക്​ നിര്‍ദേശിച്ചത്​.

അമേരിക്കയുമായുള്ള ദീര്‍ഘകാലത്തെയും സൗഹൃദവും നയന്ത്ര പ്രധാന്യവും പരിഗണിച്ചാണിത്​. ഇക്കാര്യം കോ​ണ്‍ഗ്രസിനോട്​ നിര്‍ദേശിക്കുമെന്ന്​ അമേരിക്കന്‍ പ്രസിഡന്‍റ്​ വ്യക്​തമാക്കി.

നാറ്റോ ഇതര സഖ്യപദവിയിലേക്ക്​ മാറുന്നതോടെ അമേരിക്കയുമായി സാമ്ബത്തിക, സൈനിക മേഖലകളില്‍ പ്രത്യേക പദവിയും ആനുകൂല്യങ്ങള്‍ക്കും ഖത്തറിന്​ അര്‍ഹതയുണ്ടാവും. പ്രതിരോധ ഇടപാടുകള്‍, സുരക്ഷാ സഹകരണം, ആയുധ കൈമാറ്റം തുടങ്ങിയ കാര്യങ്ങളില്‍ ഖത്തറിന് മുന്‍ഗണന ലഭിക്കും.

​അമേരിക്കയുമായി നയതന്ത്ര-സാമ്ബത്തിക മേഖലകളിലെ അടുത്ത ബന്ധത്തിന്‍റെ പ്രതീകമായാണ്​ പ്രധാന നാറ്റോ ഇതര സഖ്യ പദവി നല്‍കുന്നത്​. സൗഹൃദരാജ്യങ്ങളോടുള്ള അമേരിക്കയുടെ ബഹുമാനവും ആദരവുമാണ്​ ഇതുവഴി പ്രകടിപ്പിക്കുന്നതെന്ന്​ അമേരിക്കന്‍ പ്രതിരോധ വിഭാഗം പുറത്തിറക്കിയ പ്രസ്താവനയില്‍ പറഞ്ഞു.

ഗള്‍ഫ്​ മേഖലയില്‍നിന്നും അമേരിക്കയുടെ നാറ്റോ ഇതര സഖ്യരാജ്യമായി മാറുന്ന മൂന്നാമത്തെ രാജ്യമാണ്​ ഖത്തര്‍. 2004ല്‍ ജോര്‍ജ്​ ഡബ്ല്യു. ബുഷ്​ ​സര്‍ക്കാര്‍ കുവൈത്തിനെ ഉള്‍പ്പെടുത്തിയിരുന്നു. മറ്റൊരു രാജ്യം ബഹ്​റൈനാണ്​.

​പ്രാധാന നാറ്റോ ഇതര സഖ്യങ്ങളുടെ പട്ടികയിലെ 19-ാമത്തെ രാജ്യമാണ്​ ഖത്തര്‍. ഡൊണാള്‍ഡ്​ ട്രംപ്​ പ്രസിഡന്‍റായിരിക്കെ 2019ല്‍ ബ്രസീലിനെ ഉള്‍പ്പെടുത്തിയ ശേഷം ആദ്യമായാണ്​ പട്ടികയിലേക്ക്​ പുതിയ നിര്‍ദേശം.